På Kvitebjørnen si eiga nettutstilling finn du bilete frå elevane sine prosjektveker hausten 2009.
Elevane har tatt utgangspunkt i sitt eige nærmiljø og nytta fantasien og skaparkrafta si for å koma opp med idear til forbetringar. Ta ein kikk. Her er det mykje interessant. Kan hende du finn noko som kan passa for ditt eige lokalsamfunn.

Frå hausten 2010 blir Vinjar skule rein barneskule. Elevane har nytta prosjektvekene både til å førebu skodespel til 50 års markeringa på skulen nyleg. Dei har også jobba fram modellar av leikeapparat skulen kan byggja i framtida. Sjå bilete frå Vinjar og dei andre skulane på nettutstillinga.

- Tysdag 10.nov. hadde me "Open dag" på skulen. Då var foreldre, besteforeldre, tanter, onklar - ja alle, velkomne til skulen vår. Me hadde pilkast, utlodning, skopussing, kafè ....... Vår klasse hadde Rasmus Løland quiz, sal av laga kort med Løland sitat og gjetting av vekt på Rasmus Løland-bøker. Sjølvsagt viste me fram den flotte utstillinga vår "Fantasi og skaparkraft". Mange synest me hadde vore flinke. Då blei me stolte. (Undheim skule)
- Dette prosjektet har vore kjempekjekt og spanande. Me har jobba for harde livet for å bli ferdig, men det gjekk bra. Alle har jobba godt og effektivt. Dei fleste har laga modell, eller produkt av prosjekta sine. Me har jobba i mange forskjelige timar, blant anna kunst og handverk, RLE, natur og miljø og samfunnsfag. (Marvik skule)

Foreldre, søsken og lokalbefolkning er i det siste blitt inviterte til open dag på fleire av deltakarskulane i Kvitebjørnen-prosjektet. Resultatet av prosjektvekene er fargerike skisser av idear og flotte prototypar. Elevane har henta inspirasjon frå fortida og jobba med idear for framtida. Sjå meir detaljar på nettutstillinga.

Dette er eit utdrag frå Det falske Nashornet. Elevar ved Brakanes skule fann ut at dei ville nytta innovasjonstanken til å fornya nokre av tekstane til Rasmus Løland. Nå kan du lesa fire av dei nye tekstane på bloggen til Brakanes skule.