Lølandskrina som skulane fekk utdelt ved prosjektstart byrjar å få ein særprega utsjånad. På fleire skular har elevane dekorert reiseskrina sine.  Her ser de Røvær skule sitt skrin.

Deltakarskular i pilotprosjektet Kvitebjørnen-undring og læring tek i dag til å jobbe med prosjektet som er tenkt å vera i to veker.
Med forteljing og drama som metode skal elevar bli kjende med Løland-tekstar men også jobba med å undra seg og fortelja. I tillegg er det lagt opp til dramatisering. Det pedagogiske opplegget er tverrfagleg og det er opp til kvar av skulane korleis dei vel å leggja opp vekene sine, og kva dei vel å leggja vekt på. I alt er det rundt 200 elevar som kjem til å jobba med ulike Løland-prosjekt og me kan ta del i kva dei gjer på via skulebloggane på denne sida. Her på sida har kvar av skulane sin eigen prosjektblogg som elevane skal oppdatere i løpet av prosjektperioden.

Velkomne som deltakarar i det pedagogiske prosjektet Kvitebjørnen.
Undrande og skapande er stikkord for prosjektet, som har utspring i Rasmus Løland-markeringa 2007 – 2011 og er inspirert av hans forfattarskap.

Føremålet med prosjektet er å stimulera til meir lesing og skriving mellom barn og unge. Dette skal vera eit tverrfagleg prosjekt. Gjennom lesing, forteljing, drama, film, innovasjon og filosofi, skal elevane få kunnskapar og erfaringar innafor KRL, norsk, samfunnsfag, matematikk, naturfag, kunst og handverk.
Elevane skal læra å forstå sitt eige lokalsamfunn og dei kvalitetane som finst der. Me ynskjer at dei skal vera stolte av staden dei kjem frå, og få lyst til å påverka aktivt utviklinga vidare.

Elevar frå Nordland, Møre-og Romsdal, Sør-Trøndelag, Hordaland og Rogaland er påmelde til å delta i det pedagogiske pilotprosjektet Kvitebjørnen - undring og læring i haust.
I vekene 43 og 44 i oktober skal elevar rundt om i landet i to veker jobba med det same pedagogiske opplegget. I hovudsak er det elevar i 6. trinn som deltek, men på nokre skular blir fleire av trinna tatt med i prosjektperioden.

Deler av prosessen og resultat av prosjektperioden skal dokumenterast på eigne bloggar på denne nettstaden. Skulane har sin eigen blogg og me vil og leggja ut nyheiter frå skulane på denne sida.
Følg med utover hausten og sjå kva som rører seg på skular rundt om i landet med utgangspunkt i Rasmus Løland sine tekstar.